Atanukana mak tipatshimuna

Apu ut ishpaniht tshekuannu innuat. Kassinu eukuan ishinakushinanipan. Mukᵘ ne auen ka nipatatshet minu-mashaimuakupan ataunnisha, nete Nutashkuanit, Ekuanitshit. Nutshimit kie takuanipani atauitshuapa. Innuat tutamupanat ashit umashunishimuau. Uauitshitunanipan. Ne auen eka ka mashinaimuakanit, uitshikupan kutaka innua, mitshiminu, patshuianu tshetshi tutak umashunishima.

Nanitam tshekuan ashamitunanuipan nepatakaniti kie uauitshitunanuipan miam auen iakushiti. Uipat kushpipanat auenitshenat eka tshekuannu matshitaui innu-assit. Auen nepatatsheti, kassinu auennua tepaueu etashiniti. Nutim tshekuan ashamitunanuipan.

Tapan anite innu kuenenitak atauitshuapissinu nete nutshimit mak tapanat kie kakusseshiht/mishtikushuat kuenenitahk. Apu ut mishta-mishati ne atauitshuapiss kie ne mitshim, utit ut petautakanipan.

Kassinu nishtuapatamᵘ utshimashkueu André eshinikateniti anite eshinakushit ne atikᵘ anite atamit. Kassinu tshekuan apashtakanipan iu, apu tshekuan uepinakanit. Auat ne umetshi mitshininanipan.

Ueshkat uipat auassat ishi-ashamakanipanat nutshimiu-mitshiminu.  Anutshish nasht apu mitshiht nenu auassat, matshimatamuat.

Tipatshimu Ben Mckenzie tan ka itenitakuannit etananunit ishkanipipuna uinipekut, eka kueshpinanuti.

Ueshkat, innu mishta-shatshikupan unataun, mukᵘ eshinakuannit tshekuannu iapashtati e nataut tshi nipatatshepan. Mak ashit, innuat nipaiepanat atikua mukᵘ tshe ishpish ishpaniht tshetshi mitshishuht. Minuenitamupanat nepaiataui peikᵘ kie ma nishᵘ atikua, apu anu ut nipaiaht. Anutshish, mishta-nipaiakanu atikᵘ. Apu ishinniunanut miam ueshkat.

Nakatuapatakanipan e aitinanut katshi nipatatshenanuti. Miam mate, apu nita pitukaiakaniht ashamat pitukamit. Mishta-minuashipan nete ueshkat etananut, uikannipan mishim, anutshish apu ishinakuak, mishta-ait itenitakuan. Nimishta-mitaten nanikutini tshekuan eshinakuak, ne e aitutakauiakui, mishta-minuashipan ueshkat.

Mani ushtesha nutim aitutuenipani aueshisha nepaianiti ekue tshissimupan uiashinu meshekut anite nepatshet eshkᵘ eka tshiuetatat anite uatshinanunit.

Akua tutuakanipan aueshish katshi nipaiakanit. Mishta-ishpitenimakanipan.

Mishta-auassiuishapan ka tshishkutamuakanit kassinu nutshimiu-atusseunnu. Tan tshe aitutuat aueshisha, tshe ishi-assimet mak tshe itenuet nutshimiu-mitshiminu. Mishta-mashkuanipan atusseunnu, mishanipan eshpish animannit mukᵘ anutshish, tshissenitamu eshpish mishta-minu-minikut ukauia. Mishta-minu-apashtau anutshish.

Mishta-auassiuishapan ka tshishkutamuakanit kassinu nutshimiu-atusseunnu. Tan tshe aitutuat aueshisha, tshe ishi-assimet mak tshe itenuet nutshimiu-mitshiminu. Mishta-mashkuanipan atusseunnu, mishanipan eshpish animannit mukᵘ anutshish, tshissenitamu eshpish mishta-minu-minikut ukauia. Mishta-minu-apashtau anutshish.

Mitshetuait aitapatshiakanu atikuian : matshunisha tutakanua, teueikan mak pishakanessina. Mukᵘ aiat apu atusseshtakaniti neni eshkana kie ne atikᵘ. Mishta-anema tshekuannu atinamuat innuat, e aitinanunit mak aitutuakanit ne atikua.

Umisha Nishapet tipatshimushtakupan Mani, uapataminishapani ka mishta-shiuennanunit shashish mukᵘ uin e tshissitutak, shash apu ut mishta-shiuennanunit. Peikuau e nutepaniht mitshiminu, mueshapanat namesha ka pashuniti Nipaiamianannu, nasht apu uitshipuakue uin Mani.

Uauitamᵘ utshimashkueu Munik nishuau ka shiueniht. Ushkat shaueniht, uishkatshana muenishapani uikanisha tshetshi inniuniti. Minuat shaueniht, takuannishapan tshetshi natahk mitshiminu. Tekushinniti ushtesha, petanua matshi-tipatshimunnu.

Tapanat anite kakusseshiht/mishtikushuat nutshimit, katipaitsheht. Mishta-minuenitakushipanat, nakatamupanat umitshimuau niashipataui. Tipatshimu Mani ka mishkahk katipaisheshiniti umitshiminu anite nutshimit.

Kuekuatsheu ashimiku uiashinu maikana. Anite ashtakannu uiashinu utapanashkut mukᵘ itakanu tshetshi eka tshitapatak. Miam nakana ka aitit, apu natutak etakanit.

Kuekuatsheu mishkamᵘ mitshiminu ekue kutshishtak. Ka-mataushpakunua itenitamᵘ.

Innu minuatamᵘ e kushpit, eukuan nenu utinniun. Ben Mckenzie uauitamᵘ tsheku-mitshiminu tshetutakannit kueshpinanunit. Uauitamᵘ ashit tan ka itashiniti auennua mamu e kushpiniti.

Kuekuatsheu natshi-maniteu anite etaniti maikana. Uishamiku tshetshi mupimet mukᵘ itakanu tshetshi akunakuneuiti eshpish tshishauenanunit. Apu natutak etakanit.

Kushkupanu natukunish e mishkamuat ashinissa anite nikauia utatshishinit katshi matishuat. Ekue uitamuakanit: pineua nenu e muat uet tshi takuanniti ashinissa uiat. Pishtaukukupan passikannu itenimeshapan. Tshissenitamupanat anitshenat natukunishat aitiniti tshiashi-innua.

Minuenitamupanat innuat nepaiataui mashkua usham mitshetuait aitapatshiakanu mashkᵘ. Peikupipuna piminu kanuenitamupanat, mishta-uikannu kie uiash. Mishta-innishu mashkᵘ itakanu, nishtutamᵘ aimiakaniti mukᵘ takuannu nenu eshi-aimiakanit.

Uauitamᵘ Mani ka uitshiat utauia e nipaianiti amishkua pepunnit.

Nete nutshimit mishta-shiuennanishapan neme pipun 1941: pineu apu tat, uapush kie, namesh apu kutak. Napaiamiananut, mukᵘ peik pineu muakanu, nishunnueshinanu ma. Uauitamᵘ ashit Ben Mckenzie tan ka aitinanut napaiamiananuti nete nutshimit. Shash nenu uauapatamᵘ innu tekuatshinnit tanite tshe natshi-nipaiamiat.

Pepuk peikuau, ninashipepitshitan, apishissishipan nishim Pinamen. Nanitam kusseu Napessish. Eshakumitakussiniti peshueu namesha tshetshi mitshishuniti ushima. Manaikannu upimim ne namesh tshetshi ashamakanit ne nishim Pinamen. Nuash eshpish matapenanunit takuannu umitshim ne nishim.